კენკირა ბლუ სთარ ჭაჭა 0.5ლ

ოცნება, მცდელობა, რეალობა. წარმოებას საფუძველი ჩაეყარა კენკირას შემქმნელთა, ლუკა და გიორგი ტაკიძეების სტუდენტობის პერიოდში. ორივე ძმა ერთად იღებდა უმაღლეს განათლებას ჩრდილოეთ იტალიაში მეღვინეობისა და მევენახეობის მიმართულებით, იტალიის ერთ-ერთ ყველაზე განთქმულ სასწავლებელში, ქალაქ კონელიანოში, სადაც ძმებ ტაკიძეებს ჰქონდათ იმისი ფუფუნება, რომ კარგად აღექვათ და შეესწავლათ იტალიური მაღალ-ალკოჰოლური სასმელების ინდუსტრია, რომელიც მსოფლიოში ერთ-ერთი მოწინავეა მაღალხარისხოვანი სპირიტების მიმართულებით. მალევე დაიბადა იდეა, რომელიც გადაიზარდა ოცნებაში, რომ სამშობლოში დაბრუნებული ძმები შეეცდებოდნენ ქართული სპირიტების ინდუსტრიაში თავიანთი განათლებისთვის ხორცის შესხმას და სამამულო წარმოებაში მნიშვნელოვანი წვლილის შეტანას, ქართული სპირიტის გარდაქმნას უფრო დახვეწილ, მაღალ ხარისხობრივ პროდუქტად, ბოლოს და ბოლოს, რატომაც არა? განა რაიმეთი ჩამოუვარდება ქართული ყურძნის ჯიშები მსოფლიოში რომელიმე სხვა ქვეყნის ჯიშებს? იქით თუ არ აღემატება! რატომ არ შეიძლება ქართველი ამაყობდეს ჭაჭით, ზუსტად ისევე, როგორც ამაყობს და ტრაბახობს კიდევაც ღვინით? რატომ არ უნდა მოიხსენიებოდეს ქართული ჭაჭა დიდი პატივითა და რიდით სპირიტების მსოფლიო სცენაზე? ძმები ტაკიძეების შეხედულებით ეს ყოველივე სრულიად შესაძლებელია, უბრალოდ მოითხოვს ახალგაზრდულ ჟინს, გამბედაობასა და ექსპერიმენტების სიყვარულს, რისი შედეგიც, სინამდვიელში, არის კიდევაც კენკირა ბლუ სთარი, კომპანიის პირველი პროექტი, პირველი განაცხადი, ანუ ოცნება გადაიქცა რეალობად, რომელმაც თელავის 2025 წლის ჭაჭის ფესტივალზე ამაყად აიღო ოქროს მედალი, რამაც კიდევ ერთხელ დაარწმუნა პროდუქტის შემქმნელები, რომ ისინი სწორი მიმართულებით მიდიოდნენ. ასე დაიწყო კენკირას ამბავი, ასე იქცა იდეა ოცნებად, ოცნება მიზნად, მიზანი კი რეალობის ხორცშესხმულ ნაპერწკლად, რომელსაც საფუძვლად ყოველივე ქართულის დიდი სიყვარული უდევს. კენკირა არ არის მხოლოდ ჭაჭა, ეს არის ახალი თაობის თამამი განაცხადი, კავკასიის მთების მწვერვალებიდან გადმოფრქვეული თავზეხელაღებული ქართული ღრიალი, რომ ჩვენ აქ ვართ... და თქვენ აუცილებლად დაგვინახავთ